Shqipëria

Fuqia e COVID-19 bie me rritjen e temperaturave

Sipas mjekes shqiptare në Bruksel, rritja e rasteve të Covid në Shqipëri është shqetësuese.

E enjte, 25 Qershor 2020 - 11:30 albinfo.ch

Valbona Selimaj, mjeke në Bruksel, flet për mundësinë e një vale të dytë të Covid-19 në Shqipëri dhe vendet e tjera të rajonit. “Shqipëria ishte një histori suksesi në përballimin e fazës së parë të pandemisë, ndaj dhe duhet të kemi kujdes të shtuar për të mos kolapsuar sistemin shëndetësor që më pas do të vështirësonte menaxhimin e krizës”, shprehet mjekja, përcjell albinfo.ch.

Mjekja Valbona Selimaj e sheh me shumë shqetësim valën e dytë të Covid që ka përfshirë Shqipërinë dhe vendet e tjera të rajonit.

Në një lidhje për Ora News nga Brukseli, Selimaj thotë se Shqipëria ishte një histori suksesi në përballimin e fazës së parë të pandemisë, ndaj dhe duhet të kemi kujdes të shtuar për të mos kolapsuar sistemin shëndetësor që më pas do të vështirësonte menaxhimin e krizës.

“Jam shumë e shqetësuar si mjeke me rritjen e numrit të rasteve të reja në Shqipëri. Pothuajse në shumicën e vendeve të Ballkanit ka një rritje drastike të rasteve. Kjo do të thotë se heqja e karantinës nuk po funksionon në mënyrë korrekte. Një person i infektuar mund të infektojë 10-30 të tjerë. Nëse numri do të vazhdojë në rritet në këtë mënyrë, sistemi shëndetësor do të kolapsohet dhe do ta kemi shumë të vështirë të përballojmë krizën”, tha ajo.

Edhe pse në masë të madhe patëm infektim të bluzave të bardha, Selimaj thotë se janë qytetarët që kanë ulur vigjilencën me daljen nga izolimi dhe jo mjekët.

“Mjekët kanë bërë një punë të jashtëzakonshme këto muaj për përballimin e flukseve. Është një ulje vigjilence e popullatës. Nuk mund ta besoj që mjekët kanë ulur vigjilencën”, shprehet ajo.

Nisur nga historiku i viruseve, mjekja pranon që fuqia transmetuese bie me rritjen e temperaturave.

“Viruset e adhurojnë lagështirën dhe kohën e ftohtë. Kur ka temperatura të larta, bie virulenca e tyre, por kjo nuk do të thotë që ne jemi jashtë rrezikut. Virusi dhe pandemia është reale”.

Sa i takon situatës në Belgjikë, ku ajo jeton dhe punon, Selimaj thotë se situata po përmirësohet.

“Numri i rasteve të reja dhe viktima është ulur në mënyrë drastike gjatë gjithë muajit maj. Njerëzit kanë fituar më tepër liri. Por në çdo ambient të mbyllur duhet të përdorin maskën”, bën të ditur ajo. /Albinfo.ch