Është hapur rasti ndaj policëve që dënuan çiftin që puthej në Prishtinë

Inspektorati i Policisë së Kosovës ka iniciuar rast pas shqiptimit të gjobave me nga 450 euro për çiftin që u zu nga policët duke u puthur në afërsi të një klubi nate.

“Duke ju referuar kërkesës suaj, ju njoftojmë se pas publikimit të këtij lajmi, IPK, respektivisht Departamenti i Menaxhimit të Ankesave ka inicuar rast sipas detyrës zyrtare. Rasti në fjalë është duke u trajtuar dhe analizuar nga ky Departament”, thuhet në përgjigjen e IPK-së dhënë mediave kosovare, transmeton Albinfo.ch.

Të mërkurën e kaluar një burrë dhe një grua u gjobitën me nga 450 euro nga Policia e Kosovës, derisa në raport thuhej se çiftit “i ishte tërhequr vërejtja disa herë” që të mos kryente aktin e puthjes.

Avokati i burrit të gjobitur, ish-basketbollisti Edis Kuraja, ka deklaruar se ky veprim ka shkelur Të Drejtat e Njeriut.