A është Zvicra ende neutrale

Një sondazh i publikuar 2022 tregon zbehjen e mbështetjes për neutralitetin në Zvicër

Sondazhi i Sigurisë 2022 i drejtuar në qershor nga Akademia Ushtarake dhe Qendra për Studime të Sigurisë (CSS), dy organe të lidhura me EPF Cyrih, tregon se si pushtimi rus i Ukrainës ka ndikuar në pikëpamjet zvicerane mbi neutralitetin, shkruajnë mediat zvicerane, përcjell albinfo.ch.

Në përgjithësi, popullsia është bërë më pesimiste në krahasim me janarin. 76% e të anketuarve ishin pesimistë për situatën gjeopolitike globale, një rritje prej 8 pikë përqindjeje krahasuar me janarin 2022. Për sa i përket ndikimit në Zvicër konkretisht, 22% ishin pesimistë krahasuar me 13% në janar. Përveç kësaj, rreth një në tre raportuan se ishin më të shqetësuar për shkak të konfliktit.

Dhe ndërsa neutraliteti mbështetej ende nga një shumicë e madhe (89%), mbështetja ishte 8 pikë përqindje më e ulët se në janar, që përfaqëson rënien e parë të mbështetjes për 20 vjet. Përveç kësaj, vetëm 58% e të anketuarve mbeten të bindur se neutraliteti mbron Zvicrën nga konflikti ndërkombëtar, 11 pikë përqindje më poshtë nga 69% e regjistruar në janar 2022, përcjell tutje albinfo.ch. 

Përfshirja e Zvicrës në çështjet ndërkombëtare shihet gjithnjë e më shumë si një pengesë për neutralitetin. 39% tani e shohin neutralitetin si diçka të vështirë për t’u zbatuar, nga 29% në janar 2022.

Mbështetja për anëtarësimin e Zvicrës në NATO u rrit gjithashtu me 1 pikë përqindjeje në 27% në sondazhin e fundit, shumë mbi mesataren 10-vjeçare prej 20%. Kur u pyetën nëse anëtarësimi në NATO do të përmirësonte sigurinë e Zvicrës, 35% u pajtuan, 12 pikë më shumë se në janar 2022. 

---