OKB u kërkon shteteve të rrisin pagat

Njerëzit duhet të ndihmohen që të mos pëballen me urinë, u shpreh Olivier De Schutter, ekspert i Kombeve të Bashkuara për varfërinë ekstreme dhe të drejtat e njeriut.

Shtetet duhet të sigurohen që përfitimet sociale dhe pagat të rriten në linjë me inflacionin, në të kundërtën, njerëzit mund të përballen me uri e do ta kalojnë dimrin në të ftohtë.

“Nuk është hiperbolë nëse them që nëse qeveritë nuk rrisin përfitimet dhe pagat në përputhje me inflacionin, do të ketë jetë të humbura”, ka thënë ai, transmeton cnn, përcjell Albindo.ch.

Rritja e kërkesës për produkte dhe shërbime të tjera, pas heqjes së masave kufizuese për luftim të pandemisë së koronavirusit, dhe lufta e Rusisë në Ukrainë, besohet se janë dy shkaqet kyçe që kanë ndikuar në rritje të inflacionit në shumë vende të botës.

“Qoftë në Evropë, ku inflacioni ka prekur një rekord prej 10 për qind, apo në Afrikën nënsahariane, ku çmimet e ushqimit janë rritur për gati 24 për qind, buxhetet familjare në gjithë botën janë duke tkurrur përtej pikës kritike”, vijon më tej eksperti.

Ekspertët e OKB-së janë të pavarur. Ata nuk flasin në emër të organizatës, por kanë mandat për të raportuar gjetjet e tyre në Këshillin e të Drejtave të Njeriut.

---