Shqipëria finalizoi marrëveshjen për njohjen e pensioneve me Kroacinë dhe Zvicrën

Shqipëria dhe Kroacia kanë finalizuar me sukses marrëveshjen kuadër dhe atë administrative për njohjen e pensioneve të qytetarëve në të dy vendet, përcjell albinfo.ch.

Ministria e Financave dhe Ekonomisë bën të ditur se marrëveshja në fushën e sigurimeve shoqërore u nënshkrua në Kroaci.

Delegacioni shqiptar u kryesua nga zëvendësministrja e Financave dhe Ekonomisë, Olta Manjani, ndërsa delegacioni kroat u kryesua nga Melita Čičak, drejtor i Sistemit të Pensioneve.

Rreth 3 mijë shtetas shqiptarë do të përfitojnë nga kjo marrëveshje, e cila do të hyjë në fuqi pasi të ratifikohet nga parlamentet respektive.

Qeveria shqiptare mbetet e angazhuar për të mbrojtur të drejtat e qytetarëve shqiptarë, me qëllim që puna e tyre të njihet dhe të garantohet me ligj.

Para dy ditësh Parlamenti zviceran miratoi me 129 vota pro marrëveshjen për sigurimet shoqërore me Shqipërinë, e cila u firmos në Tiranë më 18 shkurt të këtij viti.

Lajmin e bëri të ditur Kryeministri Edi Rama, i cili falënderoi qeverinë zvicerane, parlamentarët zviceranë dhe ekipet teknike të përbashkëta, të cilat punuan pa u lodhur për këtë marrëveshje të shumëpritur për shqiptarët që punojnë e kontribuojnë në Zvicrën mike”.

Po ashtu, Rama informoi se Kryeministrja e Italisë, Giorgia Meloni, i premtoi pardje në Tiranë se shumë shpejt do të votohet në Parlamentin italian edhe marrëveshja e shumëpritur me Italinë.

Marrëveshja e miratuar sot u mundëson qytetarëve që të marrin pensione edhe kur jetojnë jashtë vendit, ndërsa të dy qeveritë do të kenë një bashkëpunim më të mirë në parandalimin e mashtrimeve dhe abuzimeve me sigurimet shoqërore.

Ajo gjithashtu lehtëson lëvizshmërinë e qytetarëve zviceranë dhe shqiptarë dhe i mbron ata nga kontributet e dyfishta të sigurimeve shoqërore.