Vazhdon rritja e çmimeve në Kroaci për shkak të Euros

Mediat kroate sulmojnë tregtarët, disa supermarkete dhe restorantet duke i akuzuar për përfitime nga ndryshimi i valutës

Bëhen gjithnjë e më të vështira blerjet e përditshme për kroatët. Hyrja në fuqi e euros, më 1 janar 2023, ka shkaktuar një rritje çmimesh të konsiderueshme. Përballë ankesave të konsumatorëve, pronarët e dyqaneve pranojnë se ka pasur ndryshime dhe ata janë detyruar të përshtasin çmimet dhe se për situatën e krijuar përgjegjës janë qytetarët që ende nuk dinë të menaxhojnë euron.

Kroacia regjistroi një inflacion prej 13.5% në muajin nëntor në një kohë që në eurozonë niveli ishte 10%. Aktualisht qindra inspektorë shtetërore kontrollojnë dyqane dhe markete në të gjithë vendin në kërkim të abuzimeve, por në nëntë ditë janë vendosur vetëm dy gjoba, shkruan Scan, transmeton albinfo.ch.

Prodhimet ushqimore dhe disa prej shërbimeve kryesore janë ato që kanë pësuar rritje rekord çmimesh, të cilat konsiderohen të pajustifikueshme nga qeveria. Mediat kroate sulmojnë tregtarët, disa supermarkete dhe restorantet duke i akuzuar për përfitime nga ndryshimi i valutës.

Indinjimi dhe zemërimi është shprehur dhe në rrjetet sociale me qytetarët që denoncojnë rritje çmimesh për bukën dhe gjalpin me 30%.

Kryeministri kroat, Andrej Plenkoviç, akuzoi një pjesë të tregtarëve dhe sipërmarrësve se po përfitojnë nga tranzicioni valutor me anë të një sjelljeje të papërgjegjshme. Ai paralajmëroi për ndërhyrje të ashpra nëse deri të premten çmimet nuk do të kthehen në nivelin që ishin në 31 dhjetor, duke shtuar se qeveria ka mjete të forta, të cilat nuk do të hezitojë t’i përdorë. Një nga ndërhyrjet e paralajmëruara nga Plenkoviç është rritja e taksave, anulimi i subvencioneve për gazin dhe energjinë, si dhe ngrirja e çmimeve në nivelet e muajit dhjetor për qindra artikuj.

---