Abdixhiku: Mashtrim dhe humbje e mundësisë historike

Foto: Facebook

Kreu i Lidhjes Demokratike të Kosovës, Lumir Abdixhiku, pas arritjes së marrëveshjes për normalizim në Ohër, ka akuzuar për mashtrim kryeministrin e Kosovës, Albin Kurti.

Sipas tij, Kurti ka kauza politike të rreme që i kanë kushtuar Kosovës.

“Mashtrim dhe humbje e një mundësie historike – ky është epilogu i Kurtit si kryeministër në dialog. Një kauzë politike e rremë – që Kosovës i kushtoi tmerrësisht shumë – përfundoi sonte. Kushtet e vëna, fjalimet e thëna, qëndrimet e dhëna, thjesht u zhbënë”, ka shkruar Abdixhiku, përcjell albinfo.ch.

Ai ka shtuar se Kurti e ka sjellë Kosovën në një pikë ku ka marrëveshje për Asociacion, pa njohje dhe jopërfundimtare. “Përveç saj, një marrëveshje pa njohje, jofinale dhe me Asociacion plus në të, është çfarë Kurti i solli Kosovës sot. Kjo gjendje e re, e shndërruar si detyrim integrues për vendin tonë, është e pariparueshme”, ka shkruar Abdixhiku, përcjell albinfo.ch.