Sot Mali i Zi po mban zgjedhje presidenciale

Qytetarët e Malit të Zi votojnë sot për të zgjedhur presidentin e ri të vendit.

Presidenti aktual, Millo Gjukanoviq, është duke garuar kundër gjashtë rivalëve të tjerë, përfshirë katër anëtarë të kampit proserb.

Vendvotimet janë hapur në orën 07:00 të mëngjesit dhe rezultatet e para pritet të dalin në mesnatë.

Gjukanoviq, 61-vjeçar, ka mbajtur pozitat më të larta në Qeverinë e Malit të Zi në tri dekadat e fundit.

Ai ka shërbyer gjashtë herë si kryeministër, përkatësisht prej vitit 1991.

Kandidatët e tjerë në garën për president janë: kreu i Demokracisë së Re serbe, Andrija Mandiq, Jakov Millatoviq nga Evropa Tani, Alleksa Beçiq, ish-kryetar i Kuvendit të Malit të Zi dhe udhëheqës i Demokratëve; Goran Danilloviq, kandidat i koalicionit Mali i Zi i Bashkuar; Draginja Vuksanoviq Stankoviq nga Partia Socialdemokrate dhe Jovan Joxhir Radulloviq, i njohur për numrin e madh të ndjekësve në mediat sociale.