Qytetarët e Parisit, të zhgënjyer që dështoi mocioni i mosbesimit ndaj Macron

Qytetarët e Parisit janë shprehur të zhgënjyer pas dështimit të mocionit të mosbesimit kundër qeverisë së Presidentit të Francës, Emmanuel Macron. Sipas policisë, u arrestuan mbi 2000 persona, pasi të njëjtët dyshohet se u vunë zjarrin plehrave në rrugë, shkruan Zëri i Amerikës, përcjell albinfo.ch.

“Mendoj se ky ishte një mohim i demokracisë. Qeveria miratoi një ligj, për të cilin shumica e francezëve janë kundër. Asambleja Kombëtare ishte kundër tij. Ne nuk i dhamë mandat për të miratuar këto reforma të padrejta”, tha Jean Regnanud, banor i Parisit, për Zërin e Amerikës, përcjell albinfo.ch.

“Vetëm nëntë vota e shpëtuan qeverinë nga mocioni i mosbesimit. Unë shqetësohem për veten dhe për të tjerët. Zgjodha një profesion që e dua, kështu që të punoj edhe dy vjet të tjera nuk është problem. Por, njerëzit në sektorin e shërbimeve sociale, janë realisht viktimat kryesore”, tha një tjetër punëtore.

Presidenti francez, Emmanuel Macron, po kërkon të vazhdojë të punojë për reformat e reja në javët e ardhshme, pasi qeveria e tij mezi i mbijetoi një mocioni mosbesimi të hënën mbi një reformë jopopullore të pensioneve, shkruan Zëri i Amerikës, përcjell albinfo.ch.