Holanda miraton eutanazinë te fëmijët

Termi “eutanazi” vjen nga greqishtja e lashtë dhe përkthehet si “vdekje e lehtë dhe e bukur”. Deri më sot, përkufizimi i plotë i eutanazisë është: “Përshpejtimi i ndërgjegjshëm dhe i qëllimshëm i vdekjes së një personi të sëmurë përfundimisht”.

Është e rëndësishme të vihen re llojet e eutanazisë sipas metodave të përdorura. Termi eutanazi aktive përdoret kur merren medikamente specifike që çojnë në ndërprerjen e proceseve jetësore në trup. Në të kundërt, eutanazia pasive është privimi i pacientit nga procedurat mbështetëse dhe mbyllja e pajisjeve që lidhen me proceset e tij të jetës.

Eutanazia e asistuar është një lloj i tretë, që është sigurimi i mjekimeve të nevojshme për pacientin, së bashku me udhëzimet se si t’i marrë ato.

Statistikat tregojnë se numri i pacientëve që duan të eutanizohen në vendet ku kjo lejohet po rritet me një ritëm relativisht të shpejtë.

Holanda do të lejojë eutanazinë te fëmijët

Holanda do të zgjerojë rregulloret e saj për eutanazinë për të përfshirë mundësinë që mjekët të ndihmojnë në vdekjen e fëmijëve me sëmundje terminale të moshës nga një deri në 12 vjeç. Rregullat e reja do të zbatohen për pesë deri në 10 fëmijë në vit që vuajnë në mënyrë të padurueshme nga sëmundja e tyre dhe nuk kanë shpresë për përmirësim.

Holanda u bë vendi i parë në botë që legalizoi eutanazinë në kushte strikte në vitin 2002. Por, ajo nuk do të jetë e para që do të lejojë mjekët të ndihmojnë në vdekjen e fëmijëve të të gjitha moshave. Belgjika e ka lejuar atë që nga viti 2014./Euronews