Sistemi shkollor zviceran merr nota të larta

Tre të katërtat e zviceranëve janë të kënaqur me sistemin arsimor, sipas një sondazhi të publikuar të enjten

Në Zvicrën frëngjishtfolëse, 82% e të anketuarve thanë se ishin të kënaqur ose mjaft të kënaqur me sistemin shkollor, krahasuar me 72% në pjesën gjermanishtfolëse të vendit. Në Ticino, kjo shifër është 79%. Në pjesën që flet romanisht të vendit, shkalla e kënaqësisë është më e ulëta, në 69%, sipas një sondazhi të gfs.bern të porositur nga Korporata Zvicerane e Transmetimeve dhe të publikuar të enjten, shkruan Swissinfo, transmeton albinfo.ch.

Shumica e të pyeturve (84%) e konsiderojnë të kënaqshëm sistemin e trajnimit të dyfishtë, ku të rinjtë mund të zgjedhin mes shkollës së mesme dhe praktikës profesionale. Gjithashtu vlerësohen mirë mundësitë për të mësuar gjatë gjithë jetës (72%).

Megjithatë, të anketuarit ishin më kritikë për trajtimin e nxënësve të talentuar dhe me nevoja të veçanta. Për të parët, vetëm 40% ishin të kënaqur me ofertën, ndërsa për të dytët vetëm 34% ishin të kënaqur. Megjithatë, 54% janë të kënaqur ose mjaft të kënaqur me përgatitjen e shkollës për jetën, transmeton tutje albinfo.ch.

Edhe pse shpesh kritikohen, mësuesit ia dalin mjaft mirë: 12% e të anketuarve e gjykojnë punën e tyre shumë pozitivisht, 55% mjaft pozitivisht, ndërsa 22% janë mjaft të pakënaqur.

Anketa u krye midis 57,000 njerëzve midis prillit dhe majit 2023.

---