Taksat kantonale dhe komunale përfaqësojnë rreth 20% të të ardhurave

(KEYSTONE/Christian Beutler)

Tatimpaguesit u paguajnë mesatarisht 19.5% të të ardhurave të tyre kantoneve dhe komunave. Barra tatimore u rrit në 19 kantone dhe ra në shtatë, tregoi të enjten Administrata Federale e Financave (AFF), shkruan albinfo.ch.

Kantonet Vaud dhe Gjenevë kanë barrën më të lartë tatimore për individët në Zvicër, me 25.6%. Nga ana tjetër, Zugu ka barrën më të ulët, me 12%.

Norma e shfrytëzimit të potencialit tatimor të individëve është rritur me 0.2 për qind krahasuar me vitin e mëparshëm. Megjithatë, zhvillimi është shumë heterogjen ndërmjet kantoneve, specifikohet në një njoftimin për shtyp, në të cilin Neuchâtel tregon rënien më të madhe dhe Lucerne rritjen më të madhe.

Në tetë kantone, indeksi i shfrytëzimit të potencialit tatimor për vitin 2024 – i cili pasqyron barrën e përgjithshme tatimore për kanton – është më i lartë se mesatarja zvicerane. Vaud ka indeksin më të lartë, i ndjekur nga Gjeneva. Fribourg dhe Neuchâtel kanë gjithashtu indekse më të larta shfrytëzimi. Valais dhe Jura janë mesatare, transmeton RTS.

Kantonet e Zvicrës Qendrore, në veçanti Zug, Schwyz, Uri, Nidwalden dhe Obwalden, kanë indekset më të ulëta. Ashtu si kantoni më i populluar, Cyrihu.

Të ardhurat totale nga taksat personale u rritën mesatarisht me 2.8%. Vetëm kantonet Neuchâtel, Basel-Landschaft dhe Schaffhausen shënuan rënie.

9.5% për personat juridikë

Personat juridikë, paguajnë 9.5% të fitimeve të tyre neto kantoneve dhe komunave. Kantonet e Valais dhe Ticino kanë barrën totale tatimore më të lartë për personat juridikë në Zvicër, me përkatësisht 21 dhe 18%. Me 2.8 dhe 3%, Zug dhe Schaffhausen janë kantonet me barrën më të ulët tatimore.

Në 14 kantone, indeksi i shfrytëzimit të potencialit fiskal për vitin 2024 është mbi mesataren zvicerane dhe dymbëdhjetë kantone janë nën mesatare. Valais dhe Ticino kanë indekset më të larta dhe Zug dhe Schaffhausen më të ulëtat.