Konkurrenca në treg: Volkswagen me vetura elektrike me kosto të ulët

Synimi është ndërtimi i automjeteve elektrike për tregun evropian, me çmim rreth 20.000 euro

Volkswagen do të ndërtojë vetura elektrike me kosto të ulët, për të konkurruar më mirë me rivalët e ashpër kinezë, deklaroi të martën shtëpia më e madhe automobilistike evropiane, pasi bisedimet me Renault për të bashkëpunuar në projekt dështuan në fillim të muajit.

Synimi është ndërtimi i automjeteve elektrike për tregun evropian, me çmim rreth 20.000 euro, deklaroi Volkswagen, duke shtuar se vetura e parë pritet të dalë në vitin 2027.

“Bëhet fjalë për lëvizshmëri elektrike entry-level nga Evropa për Evropën”, deklaroi CEO i Volkswagen, Oliver Blume, shkruan Monitor, transmeton albinfo.ch.

“Në këtë mënyrë ne tregojmë angazhim të qartë ndaj Evropës, si qendër industriale, një politikë industriale evropiane dhe së fundi, veprojmë në interesin e klientëve evropianë”.

Projekti, i quajtur ID.1, lind në momentin kur rivalët kinezë, disa prej të cilëve kanë avantazh prej 30% në kosto krahasuar me konkurrentët në Perëndim, po hyjnë në Evropë, duke rrëmbyer pjesë tregu dhe duke goditur shtëpitë automobilistike të njohura në vendin e tyre të origjinës.

Javën e kaluar Volkswagen tha se industria evropiane ka dy deri në tre vjet për t’u përgatitur ndaj kërcënimit të konkurrencës, duke paralajmëruar se mbijetesa e sektorit ishte në rrezik.

Në vazhdën e këtyre përpjekjeve, Volkswagen po zbaton masa kursimi dhe për reduktimin e kostove në një vlerë rreth 10 miliardë euro për markën e saj kryesore brenda vitit 2026.

Drejtuesi i markës Volkswagen, Thomas Schaefer, deklaroi se pavarësisht çmimit të ulët, modeli fillestar i parashikuar do të vendosë standarde në lidhje me teknologjinë, dizajnin dhe cilësinë, duke shtuar se kjo do ta bëjë më sfiduese për shkak të rritjes së kostove të energjisë, lëndëve e para dhe fuqisë punëtore.

“Një gjë është e qartë – lëvizshmëria elektrike nga Evropa për Evropën mund të ketë sukses vetëm me mbështetjen politike dhe kushteve të kornizës konkurruese”, deklaroi Schaefer.

 

---