2 shtete ia ndalojnë Vuçiqit fluturimin drejt Moskës

Pas Lituanisë, edhe Letonia ka ndaluar fluturimin e aeroplanit serb që transportonte presidentin e Serbisë, Aleksandar Vuçiq, drejt Moskës. Autoritetet letoneze e arsyetuan vendimin me “ndjeshmërinë politike të qëllimit të fluturimit”.

Më herët, Lituania kishte refuzuar kalimin e të njëjtit avion për arsye të “ndjeshmërisë teknike dhe diplomatike”, duke ngritur shqetësime për qëllimet dhe ndikimin e udhëtimit të Vuçiqit në kontekstin aktual gjeopolitik.

Sipas ndihmësit të presidentit rus, Yuri Ushakov, Vuçiq pritet të takohet me homologun Vladimir Putin më 9 maj, në kuadër të një vizite që do të trajtojë tema dypalëshe mes dy vendeve.

Ky zhvillim vjen në një moment të tensionuar për rajonin, ndërsa Serbia ruan lidhje të ngushta me Rusinë, në kundërshtim me linjën politike të shumë vendeve të BE-së dhe NATO-s.