Riola Xhemaili, e lumtur që kualifikoi Zvicrën

Futbollistja shqiptare është shprehur krenare që bëri një popull të lumtur

Zvicra festoi me golin e futbollistes shqiptare. Goli do të mbetet në histori, shkruan mediumi “20 Minuten” e po ashtu edhe “Blick”, transmeton albinfo.ch.

Me atë gol, Zvicra u kualifikua për herë të parë në çerekfinale të Kampionatit Evropian.

Evropiani po mbahet në Zvicër, ndërsa thuajse i gjithë ky vend festoi të enjten mbrëma.

“Kam dashur të vrapoj drejt tifozëve, por kishte një rrethojë dhe nuk kam dashur të rrëzohem në të”, ka thënë Xhemaili.

“Është e mahnitshme. Është ndjenja më e mirë që kam përjetuar ndonjëherë. Është sikur një ëndërr e bukur që realizohet”, shtoi sulmuesja shqiptare.

Ajo hyri në lojë vetëm në minutën e 82-të. “E kam ditur se do të shënoj atë gol. Pasi erdhi topi e kam ditur se ku duhet të jem. Është dashur vetëm të mos jem në ofsajd. Dhe më pas goli hyri në portë. Është e ëmbël që e përjetojmë këtë, e meritojmë”, ka thënë Xhemaili, që është e lumtur që i bëri krenarë familjarët e saj.

“Shumë kanë dyshuar në mua. Por mendoj se kam treguar pse jam këtu dhe që mund ta ndihmoj ekipin”, ka thënë futbollistja shqiptare.

“Është e pabesueshme se si po e bëjmë Zvicrën të festojë”, ka vazhduar sulmuesja.

---