Kosovë: Moti përkeqëson situatën me zjarret, 29 që nga mëngjesi i sotëm

Ilustrim, Agjencia e Menaxhimit Emergjent

Agjencia e Menaxhimit Emergjent në Kosovë ka njoftuar se, për shkak të temperaturave të larta dhe erërave të forta, në disa zona të Kosovës janë përhapur zjarre.

“Situata e përcjellë nga Qendra Operative e Agjencisë rezulton me gjithsej 29 vatra të zjarreve në 8 orët e fundit”, thuhet në njoftimin e Agjencisë.

Prej këtyre zjarreve, 17 janë lokalizuar, ndërsa 12 mbeten ende aktive, teksa nga kjo agjenci kanë deklaruar se shumica e zjarreve masive në Kosovë shkaktohen nga dora e njeriut, transmeton albinfo.ch.

Ndryshe, sipas Sistemit Evropian të Informacionit për Zjarret në Pyje, vetëm gjatë vitit 2024 në Kosovë ishin regjistruar 94 zjarre, të cilat kishin djegur gjithsej 12.079 hektarë pyje dhe shkurre.