Të gjitha biletat për ndeshjen Zvicër – Kosovë janë shitur

Rekord interesimi: Të gjitha biletat për Zvicër – Kosovë janë shitur

Interesimi për ndeshjen mes Zvicrës dhe Kosovës ka arritur nivele rekord. Mediumi zviceran Blickraporton se tashmë janë shitur të gjitha biletat për këtë përballje, e cila do të zhvillohet nesër në stadiumin St. Jakob-Park në Basel, transmeton albinfo.ch.

Ky stadium pritet të jetë i stërmbushur, ndërsa një pjesë e konsiderueshme e tifozëve do të jenë mërgimtarë shqiptarë që jetojnë në Zvicër dhe në vende të tjera të Evropës. Sipas “Blick”, ky interes i madh nuk është i papritur, duke marrë parasysh se edhe në ndeshjet kualifikuese për Kampionatin Evropian në nëntor 2023, stadiumi ishte mbushur tërësisht.

Në kontrast, për ndeshjen e Zvicrës me Slloveninë që do të zhvillohet të hënën që vjen, janë shitur vetëm 8,000 bileta nga 33,996 të mundshme, sipas të njëjtit medium.

Kosova nis kështu kampanjën kualifikuese për Botërorin 2026, me pritshmëri të mëdha nga futbollistët dhe mbështetësit. Takimi do të nisë në orën 20:45, ndërsa të hënën që vjen Kosova do ta presë Suedinë në Prishtinë për ndeshjen tjetër kualifikuese.

Ky entuziazëm tregon mbështetjen e madhe të publikut shqiptar dhe pritshmëritë e larta për Kombëtaren Dardane në këtë cikël kualifikues.

---