Nxënësit shqiptarë, “Vjeshta flet shqip” në Vjenë, aktivitete pedagogjike, edukative e kulturore

Foto FB: Miradije Berisha

Fëmijët e mësimit plotësues në gjuhën shqipe në „ Schiffschule“ të Vjenës, më 17 tetor 2025, zhvilluan një aktivitet pedagogjik, edukativ-kulturor, me moto “Vjeshta flet”.

Sipas njoftimit, në këtë aktivitet të veçantë morën pjesë, përveç nxënësve, edhe prindërit e tyre, të cilët u përfshinë aktivisht në biseda, punëtori dhe lojëra me tematikë vjeshtore. Aktiviteti filloi me një rreth mirëseardhjeje, ku fëmijët të cilët ndanë mendimet dhe ndjesitë e tyre për stinën e vjeshtës, se çfarë sjell ajo, si na bën të ndihemi dhe cilat janë ngjyrat dhe aromat që e karakterizojnë, transmeton albinfo.at.

Për të përforcuar përjetimin emocional dhe kulturor, fëmijët kënduan së bashku një këngë për vjeshtën, duke shprehur gëzimin dhe kreativitetin e tyre nëpërmjet muzikës shqipe teksa në përmbyllje, të gjithë pjesëmarrësit shijuan një sallatë të freskët me fruta të stinës dhe lëng frutash natyral, duke mbyllur aktivitetin me shije të ëmbël dhe buzëqeshje.

“Aktiviteti nuk ishte vetëm një orë mësimi, por një përjetim i plotë, që afroi fëmijët me gjuhën, kulturën dhe komunitetin shqiptar. Me këtë dëshmohet se gjuha mësohet më lehtë kur flitet me dashuri dhe kultura e identiteti kombëtar ruhet më mirë kur përjetohet së bashku”, thuhet në njoftim.