Problemi i kokainës në Evropë dhe roli i Zvicrës:  Sasi rekord dhe rrugë të reja tregtie

Gati 40 kilogramë kokainë u gjetën në një makinë në autostradën A2 pranë Capolago në Ticino të shtunën e kaluar. Trizetë kilogramë të tjerë u zbuluan disa ditë më parë në një makinë tjetër në Novazzano. Në fund të nëntorit, gjithashtu u arrestuan gjashtë anëtarë të një bande ndërkombëtare në Zvicër; besohet se ata ishin pjesë e një rrjeti që kontrabandonte mbi një ton kokainë nga Amerika e Jugut drejt Evropës.

Këto incidente vendosin përsëri Zvicrën në qendër të tregtisë ndërkombëtare të kokainës – një biznes kriminal që lulëzon në një Evropë që është bërë tregu kryesor për këtë drogë. E gjithë kontinenti, duke përfshirë Zvicrën, po përmbytet nga një “valë e bardhë”, transmeton albinfo.ch.

Sipas ekspertës për krimin e organizuar Anna Sergi, është e vështirë të përcaktohet madhësia reale e tregut të kokainës. Ajo është profesoreshë në disa institute dhe ekspert për trafikimin e kokainës në portet kryesore evropiane. “Ekzistojnë vlerësime nga Agjencia Evropiane e Droge (EUDA) dhe Europol që flasin për rreth 400 deri 430 tonë kokainë të sekuestruar, një rekord. Por këto të dhëna përfshijnë vetëm sasinë e kapur, pra vetëm pjesën që është zbuluar.”

Vlerësimi i ekspertës Sergi mbi trafikimin e drogës në Evropë

Sipas Sergi, tregu është jashtëzakonisht fitimprurës, por askush nuk e di saktësisht se sa para janë të përfshira. “Pasi gjithmonë flitet për substanca të sekuestruara, vlerësimi mbetet i pjesshëm; një pjesë e konsiderueshme e tregut të kokainës shpesh mbetet e padukshme,” thotë ajo.

Evropa shihet si tregu kryesor referues sepse këtu ka gjithnjë më shumë përdorues. Për pasojë, vendet e Amerikës së Jugut kanë rritur prodhimin. Sergi thekson se kapacitetet logjistike janë përmirësuar, gjë që ka nxitur furnizimin në Evropë.

Roli i Zvicrës

Zvicra është e ngjashme me pjesën tjetër të Evropës, me grupe kriminale të përbërjes etnike të ndryshme. “Vetëm disa prej tyre organizojnë tregtinë dhe kanë paratë e nevojshme për të bërë porosi në Amerikën Latine dhe për të financuar sasitë e mëdha,” shpjegon Sergi.

Tregtimi brenda Evropës organizohet kryesisht nga grupe lokale, ndonjëherë transnacionale, që veprojnë si shpërndarës të mëdhenj. ‘Ndrangheta mbetet lider, si në tregti ashtu edhe në shpërndarje në nivel evropian. Pastaj ka grupe më të vogla me lidhje me Camorra-n, grupe me origjinë turke ose banda lokale të origjinës nigeriane ose zvicerane.

Zvicra ka një rol jashtëzakonisht të rëndësishëm logjistik. Meqenëse ndodhet në mes të Evropës, ajo shtrihet përgjatë korridorit midis porteve të mëdha veriore dhe atyre jugore.