Blerjet online për dhuratat e Krishtlindjeve mbeten të pandryshuara, por tregtarët shprehin shqetësim

pixabay

Pothuajse një e treta e dhuratave të Krishtlindjeve në Zvicër vazhdojnë të porositen në internet, një trend që mbetet i qëndrueshëm prej disa vitesh, por që vazhdon të shqetësojë shitësit me pakicë, veçanërisht në qytetet e mëdha.

Sipas një studimi të Federatës Zvicerane të Tregtisë me Pakicë, rreth 37 për qind e dhuratave festive këtë sezon janë blerë online. Edhe pse kjo shifër nuk ka shënuar rritje gjatë tre viteve të fundit, për tregtarët lokalë situata mbetet alarmante, transmeton albinfo.ch.

“Për një dyqanxhi, nuk mjafton të ketë klientë vetëm një muaj në vit. Qëndrueshmëria varet nga prania e tyre gjatë gjithë vitit”, shprehet Claudio Bocchia, anëtar i kolektivit të tregtarëve të Lozanës “Stop! Jemi të ngopur”. Sipas tij, një nga problemet kryesore është aksesueshmëria e dobët e dyqaneve me makinë, çka i shtyn konsumatorët drejt blerjeve online.

Masa për të gjallëruar qendrën e qytetit

Për t’iu përgjigjur këtyre shqetësimeve, Qyteti i Lozanës ka ndërmarrë një iniciativë gjatë muajit dhjetor, duke investuar afro gjysmë milioni franga. Masat përfshinë transport publik falas si dhe lehtësira parkimi për tre të shtuna radhazi, me synim nxitjen e blerjeve në dyqanet fizike të qytetit.

Rënie e bizneseve lokale

Sipas të dhënave të publikuara nga gazeta Le Temps, Lozana ka humbur 11 për qind të bizneseve të saj që nga viti 2011, ndërkohë që mesatarja e rënies për gjithë kantonin e Vaud është rreth 4 për qind.

Kryetari i bashkisë së Lozanës, Grégoire Junod, thotë se nevojiten masa të shumëanshme: “Duhet të veprojmë në promovim, aksesueshmëri dhe mbështetje të ngjarjeve e iniciativave që vetë tregtarët mund t’i zhvillojnë”.

Edhe pse në muajt e fundit është zhvilluar një dialog më konstruktiv mes autoriteteve dhe përfaqësuesve të tregtarëve, interesat mbeten të ndërlikuara. “Nuk jemi naivë, zgjedhjet komunale janë vitin e ardhshëm, por këto masa kërkojnë muaj diskutimesh dhe pune për të arritur kompromis”, thekson Anne-Lise Noz, presidente e Shoqërisë Kooperative të Tregtarëve të Lozanës.