Zvicerani përplas për vdekje kosovarin 83-vjeçar, dënohet vetëm me para

Shoferi në telefon përplasi për vdekje kosovarin, dënimi ngjall polemika

Një aksident fatal trafiku që ndodhi në nëntor të vitit 2023 në Horgen (ZH) ka përfunduar me një dënim që po ngjall reagime të forta. Një shtetas zviceran është shpallur fajtor për vrasje nga pakujdesia, pasi me veturën e tij përplasi për vdekje një kosovar 83-vjeçar, i cili po kalonte në vijat e bardha të këmbësorëve, transmeton albinfo.ch.

Sipas raportimit të gazetës “Tages-Anzeiger”, vendimi është marrë sot nga Gjykata e Qarkut në Horgen, ndërsa procedura është zhvilluar përmes një urdhër-dënimi nga Prokuroria Limmattal/Albis.

Shoferi ishte në telefon në momentin e aksidentit

Ngjarja ndodhi kur shoferi, atëkohë 51 vjeç, nuk e vuri re këmbësorin që po kalonte rrugën. Hetimet e Policisë Kantonale të Cyrihut zbuluan se burri ishte duke përdorur telefonin mobil gjatë drejtimit të automjetit, trasmeton tutje albinfo.ch.

Sipas të dhënave të analizuara nga policia:

në orën 11:50 ai kishte shkruar një SMS,

14 sekonda më vonë kishte bërë një screenshot të mesazhit,

dhe 17 sekonda më pas, menjëherë pas aksidentit, kishte telefonuar policinë.

Kosovari 83-vjeçar nuk u mbijetoi plagëve të marra dhe ndërroi jetë në vend.

Dënim i butë, reagime të forta

Sot 53 vjeç, i pandehuri zviceran u dënua me 180 ditë-gjobë nga 30 franga, me kusht dhe periudhë prove prej dy vitesh si dhe një gjobë prej 800 frangash zvicerane

Në sallën e gjyqit, ai u kërkoi falje familjarëve të viktimës, duke thënë:
“Nuk kam fjalë. Edhe brenda meje ka vdekur një pjesë.”

Megjithatë, dënimi është cilësuar si tejet i lehtë nga avokati Martin Hablützel, i cili në një prononcim për “Tages-Anzeiger” u shpreh se një masë e tillë përbën “një goditje të dytë për familjarët e viktimës”.

Ai theksoi se të gjithë janë të vetëdijshëm se përdorimi i telefonit gjatë vozitjes është i ndaluar dhe jashtëzakonisht i rrezikshëm, ndërsa një gjobë kaq e ulët, sipas tij, nuk ka asnjë efekt parandalues. /Albinfo.ch

---