Ankandi bamirës i pikturave në Cyrih mbledh fonde për gratë e prekura nga kanceri i gjirit

15 vepra arti u shitën me sukses në një mbrëmje solidariteti të organizuar në Restaurant Andulino

Më 20 shkurt 2026, në Restaurant Andulino, u mbajt me sukses Ankandi Bamirës i Pikturave, një ngjarje që bashkoi artistë, dashamirë të artit dhe mbështetës të kauzave sociale për një qëllim të përbashkët: mbështetjen konkrete të grave të prekura nga kanceri i gjirit, shkruan albinfo.ch.

Në këtë mbrëmje u prezantuan 15 vepra arti të realizuara nga artistë nga Kosova, Shqipëria, Maqedonia e Veriut dhe Zvicra, të cilat ishin krijuar gjatë rezidencës artistike në edicionin e pestë të Festivalit “Shliroj Cicat”, të mbajtur në tetor 2025. Të gjitha veprat u shitën, duke siguruar fonde që do të dedikohen për mbështetje direkte të grave të prekura nga kjo sëmundje.

Programi artistik u pasurua me performanca muzikore, ndërsa prezantimi i veprave dhe artistëve u realizua nga Kaltrina Ajeti dhe Resul Sinani.

Të pranishmëve iu drejtua me një fjalë përshëndetëse edhe ambasadori i Republikës së Kosovës në Zvicër, Mentor Latifi, i cili e cilësoi këtë iniciativë si një shembull të fuqishëm të ndërthurjes së artit me përgjegjësinë shoqërore, duke theksuar rëndësinë e angazhimeve të tilla në diasporë.

Ndërkaq, Kryesuesi i Bordit të OJQ-së CICAT, Ridvan Ademi, dhe Drejtoresha Ekzekutive, Ermira Murati, vlerësuan vazhdimësinë e kësaj nisme dhe rolin e artit si mjet solidariteti dhe ndikimi shoqëror.

Veprat e ankanduara u realizuan nga artistët: Arnilda Kysyku, Drenusha Palloshi, Edona Blakaj, Endrita Purellku, Enesa Memeti, Engji Jaha, Helidon Haliti, Hajrush Fazliu, Ilmi Sadiku, Krist Dragot, Vesa Buklla, Verim Zendeli dhe Zana Ramadani, si dhe nga dy artiste shqiptare që jetojnë dhe veprojnë në Zvicër, Bedrije Hamiti dhe Dorina Ukgjini.

Ky aktivitet dëshmoi se arti mund të shndërrohet në veprim konkret dhe mbështetje reale për komunitetin. Organizatorët falënderuan të gjithë artistët, blerësit dhe mbështetësit që kontribuuan në realizimin e kësaj mbrëmjeje solidariteti./Albinfo.ch

---