Migros tërhiqet nga Gjermania pas 14 vitesh, humb mbi 570 milionë franga

Gjiganti zviceran i tregtisë shet zinxhirin dhe vendos të përqendrohet sërish në tregun zviceran.

Gjiganti zviceran i shitjes me pakicë Migros ka vendosur të tërhiqet plotësisht nga tregu gjerman, duke i dhënë fund një aventure 14-vjeçare që i ka kushtuar kompanisë më shumë se 570 milionë franga zvicerane, përcjell albinfo.ch.

Tërheqja realizohet përmes shitjes së zinxhirit të supermarketeve bio Tegut, i cili do të merret nga gjiganti gjerman i tregtisë me pakicë Edeka. Me këtë vendim, dega më e madhe e grupit, Migros Zürich, i jep fund aktivitetit të saj në Gjermani.

Transaksioni përfshin jo vetëm rrjetin e supermarketeve bio, por edhe furrën e madhe Herzberger dhe operacionet logjistike të kompanisë. Në total, rreth 7400 punonjës dhe 340 filiale, si dhe qendra logjistike dhe selia në Fulda në landin Hessen, preken nga ky vendim.

Shefi i Migros Zürich, Patrik Pörtig, tha se situata e Tegut është përkeqësuar ndjeshëm pavarësisht përpjekjeve për ristrukturim. “E kemi analizuar në detaje situatën dhe kemi arritur në përfundimin se Tegut nuk është ekonomikisht i qëndrueshëm në afatgjatë,” deklaroi ai.

Sipas kompanisë, ndërmjet viteve 2019, 2024 dhe 2025 janë bërë zhvlerësime të huave dhe investimeve në vlerë prej 512 milionë frangash. Edhe pse humbjet operative u ulën nga 55 milionë franga në 2024 në 26 milionë franga në 2025, biznesi vazhdoi të mbetej me rezultate negative.

Një nga arsyet kryesore të tërheqjes është konkurrenca shumë e fortë në tregun gjerman të shitjes me pakicë. Sipas Pörtig, diskontet si Aldi dhe Lidl janë “konkurrentë jashtëzakonisht agresivë”, ndërsa rrjetet e mëdha si Rewe dhe Edeka dominojnë tregun.

Në këto kushte, Tegut si një lojtar rajonal dhe me përmasa të mesme nuk arriti të konkurronte në mënyrë të qëndrueshme. Për këtë arsye, Migros ka vendosur të përqendrojë strategjinë e saj kryesisht në tregun vendas në Zvicër. /Albinfo.ch

---