Inteligjenca artificiale po transformon mënyrën se si turistët planifikojnë udhëtimet e tyre, duke detyruar hotelet zvicerane të përshtaten me një realitet të ri dixhital, transmeton albinfo.ch.

Sipas shoqatës HotellerieSuisse, gjithnjë e më shumë udhëtarë po përdorin asistentë të inteligjencës artificiale, si ChatGPT, për të gjetur hotelin ideal. Në vend që të kërkojnë në lista të gjata ofertash, ata zhvillojnë një bisedë me asistentin virtual, i cili krijon një program udhëtimi të personalizuar sipas nevojave dhe preferencave të tyre.

Ky ndryshim po e bën konkurrencën edhe më të fortë për hotelet. Ndryshe nga platformat tradicionale të rezervimeve, asistentët e AI zakonisht rekomandojnë vetëm tre deri në pesë hotele, duke u dhënë atyre një avantazh të madh nëse përfshihen në këtë listë.

“Është një mundësi e madhe, por hotelet duhet të bëjnë detyrat e shtëpisë”, thotë Magdalena Glausen nga HotellerieSuisse. Sipas saj, faqet e internetit të hoteleve duhet të jenë të strukturuara në mënyrë që inteligjenca artificiale të mund të lexojë dhe kuptojë informacionin. Në të kundërtën, hoteli rrezikon të mos shfaqet fare në rekomandimet e AI.

Të dhënat për vitin 2025 tregojnë se rezervimet direkte mbeten mënyra më e përdorur në Zvicër, duke përbërë 58.6 për qind të të gjitha rezervimeve. Platformat online zënë 30.7 për qind, ndërsa pjesa tjetër ndahet mes agjencive turistike, zinxhirëve hotelierë dhe kanaleve të tjera të shitjes.

Megjithatë, me rritjen e përdorimit të inteligjencës artificiale, sektori hotelier pritet të përballet me një transformim të madh, ku dukshmëria në platformat e AI mund të bëhet po aq e rëndësishme sa prania në faqet tradicionale të rezervimeve./Albinfo.ch