A kandidon Kim Mehmeti për kryetar të Shkupit ?

Opozita po kërkon kandidat të sigurt për fitore, të pranueshëm për pjesën më të madhe të votuesve maqedonas dhe shqiptarë

Një post “i rezervuar” pothuaj ekskluzivisht vetëm për kandidatë maqedonas, ai i kryetarit të qytetit të Shkupit, duket se mund të bjerë në dorë të një shqiptari. Kështu së paku ka shkruar gazeta “Lajm” e Shkupit, duke iu referuar “burimeve opozitare”.

Intelektuali i mirënjohur shqiptar nga Shkupi Kim Mehmeti do të jetë kandidat i përbashkët i opozitës për kryetar të qytetit të Shkupit në zgjedhjet e ardhshme lokale, njoftojnë burime opozitare”, shkruan gazeta “Lajm”.

Gazeta më tutje thotë se opozita është duke kërkuar kandidat të sigurt për fitore në kryeqytet, i cili do të ishte i pranueshëm për pjesën më të madhe të votuesve maqedonas dhe shqiptarë. Emri i Kim Mehmetit është në rrethin më të ngushtë të kandidatëve të cilët janë duke u shqyrtuar, pasi që ai, me kapacitetin e vet intelektual konsiderohet si figurë e pranueshme për dy komunitetet më të mëdha.

“Kandidimi i tij do të ishte një hap historik për tolerancën ndëretnike. Me projektet kontroverse, pushteti aktual nga Shkupi filloi përhapjen e urrejtjes ndëretnike në qytetet tjera të Maqedonisë, andaj prej këtu duhet të fillojë edhe procesi i kthimit të mirëbesimit. Jemi të sigurt se për Mehmetin do të votonin 99 për qind e votuesve shqiptarë, por edhe pjesa më e madhe e votuesve maqedonas kanë respekt për të”, thonë këto burime, duke sqaruar shkaqet pse emri i Kim Mehmetit po shqyrtohet seriozisht si kandidat i mundshëm për kryetar të Shkupit. Vetë Mehmeti me modesti i komenton Informatat për kandidim të mundshëm për kryetar të Shkupit, por tani për tani as nuk i konfirmon e as nuk i demanton ato.

“Nuk jam i prirë që nga spekulimet e vogla të ndërtoj gënjeshtra të mëdha, me të cilat do e mbivlerësoja vetveten sa të vetëgënjehem se qarqet politike merren me mua. Jetoj në paqe me ambiciet e mia dhe me atë se çka presin të tjerët nga unë, e çka unë nga ata. Por, nuk dua as ta gënjej opinionin publik e të mos e pranoj se sa here afrohen zgjedhjet vendore apo parlamentare, fillojnë edhe “ofertat” partiake nga më të ndryshmet. Sa për këtë që flitni ju, unë nuk di gjë. E konsideroj legjitime që cili do qark politik të mendojë se (s)vlej gjë për ta, njësoj siç është legjitime edhe bindja ime se as unë u duhem partive politike aq sa spekulohet nëpër media, as ato më nevojiten mua aq sa do mendonte dikush!”, deklaroi për “Lajm”, Mehmeti.

Ajo që dihet nga historia e deritashme e zgjedhjeve për kryetar të Shkupit është se partitë shqiptare “vetëm formalisht kanë marrë pjesë me kandidatë për këtë post, pasi gjasat e tyre për të fituar këtë post nuk janë as teorike. Për këtë shkak Partia Demokratike Shqiptare (PDSH) me siguri do të përkrahë kandidatin e LSDM-së, kurse ende nuk dihet nëse BDI do të paraqitet me kandidat të vetë, shkruan gazeta “Lajm.