A do të zhvendosen amerikanët nga Bondsteel?

Ambasada amerikane në Prishtinë për Kallxo.com, ka bërë të ditur se lajmi është tërësisht i pavërtetë dhe trillim

Brenda një periudhe të shkurtër ushtria amerikane do të zhvendoset nga Kampi Bondsteel që është baza kryesore e Ushtrisë së Shteteve të Bashkuara të Amerikës në Kosovë.

Ndërsa një pjesë e vogël ushtarakesh do të ripozicionohen te Film City në bazën e KFOR-it në Prishtinë.

Në hapësirat e Bondsteel-it do të vendoset Forca e Sigurisë së Kosovës.

Sipas informatave të Albanian Post nga burime amerikane, reduktimi i madh i tërheqjes së ushtarëve do të ndodhë gjatë muajit maj.

Ndërsa i gjithë personeli civil shqiptar brenda kampit në fjalë nuk do të angazhohen edhe nga FSK-ja, praktikisht do të mbetën pa punë.

Sipas të njëjtave burime, brenda këtij viti do të fillojë ndërtimi i një baze tjetër amerikane në Kosovë.

Kjo bazë do të nderohet në pikën më të lartë të Bjeshkëve të Rugovës, saktësisht afër kufirit me Malin e Zi, përcjell albinfo.ch.

Pra, një bazë ushtarake për Monitorimin e Hapësirës Ajrore.

Mohimi

Megjithatë, zyrtari për Marrëdhënie me Publikun në KFOR, Jace Rivard, e ka mohuar se forcat amerikane do të zhvendosen nga Bondsteeli.

“Forcat amerikane nuk do të tërhiqen nga kampi Bondsteel apo Kosova”, tha Rivard.

“Njësia e Ushtrisë Amerikane që do na zëvendësojë në mars, aktualisht po kryen trajnime në Shtetet e Bashkuara për vendosjen në Kosovë për të na zëvendësuar si KFOR30”.

Ai shtoi se “ne do të vazhdojmë të veprojmë sipas mandatit tonë që rrjedh nga Rezoluta 1244 e Këshillit të Sigurimit të Kombeve të Bashkuara dhe Marrëveshja Teknike Ushtarake”.

Dezinformim

Por, Ambasada amerikane në Prishtinë për Kallxo.com, ka bërë të ditur se lajmi është tërësisht i pavërtetë dhe trillim, madje edhe ‘dezinformim rus’, duke mohuar se do të largohen nga Bondsteel ose Kosova.

 

---