Abuzimi bankar

Për çdo shërbim që aplikojnë bankat në Kosovë, klientët detyrohen të bëjnë pagesë. Madje, edhe për nxjerrjen e dokumenteve të thjeshta, siç është “Visa Confirmation”. Për këtë shërbim paguhet 2.5 euro, pavarësisht pagesës për mirëmbajtjen e llogarisë. Bankat më të shtrenjta në shërbime mbesin ProCredit dhe Raiffeisen. Më e lira është Banka Kombëtare Tregtare.

Nuk ka shërbim që e ofrojnë bankat në Kosovë, për të cilin nuk kërkojnë pagesë. Madje, edhe kur është fjala për nxjerrjen e një dokumenti të thjeshtë.Rast konkret është me “Visa Confirmation”, një dokument ky që e kërkojnë ambasadat, kur aplikohet për vizë. Në të figurojnë vetëm të dhënat se je klient i bankës dhe detaje të tjera. Për këtë shërbim, qytetarët duhet të paguajnë dy euro e gjysmë, pavarësisht se paguajnë rreth 6, 12 e 20 euro në vit për mirëmbajtjen e llogarisë.

Një rast si ky e ka befasuar qytetarin nga Prishtina, A. K. Ai është detyruar të paguajë dy herë, për një “Viza Confirmation”, në bankën “ProCredit”. Kjo, pasi në ambasadë nuk ia kanë pranuar dokumentin me arsyetimin se nuk përputheshin datat.

Ky qytetar tregon se kur është kthyer në bankë për ta bërë atë përmirësim, e kanë detyruar të paguajë edhe dy euro e gjysmë, edhe pse kaq i kishte dhënë në fillim. Do të thotë 5 euro për një dokument konfirmimi si klient i bankës.“Unë paguaj një shumë të caktuar vjetore për mirëmbajtje dhe ata sërish më kërkojnë 2.5 euro për një pasqyrë të xhirollogarisë që mendoj se është detyrim ndaj klientit”, tha ky qytetar i shqetësuar.

Si për çudi, më të shtrenjta në shërbime janë pikërisht ato banka që kanë numrin më të madh të klientëve dhe depozitave. Shembull, banka ProCredit, që së bashku me Raiffeisenin, janë ndër më të mëdha në vend, për mirëmbajtjen e xhirollogarisë i marrin qytetarit prej 0.50-0.75 euro në muaj.