Aeroplani rrëzohet në det, shpëtojnë pasagjerët

Një Aeroplan i tipit “Lion Air Boeing 737” me rreth 172 pasagjerë në bord përfundoi në det, pasi nuk arriti të frenojë gjatë uljes në pistë

Foto ilustrim

Një ngjarje e pazakontë për fat të mirë pa viktima ka ndodhur në një prej aeroporteve të Balit, ku një avion me rreth 172 pasagjerë në bord përfundoi në det, pasi nuk arriti të frenojë gjatë uljes në pistë.

Lajmin e kanë bërë të ditur burime zyrtare indoneziane, të cilat saktësojnë se të gjithë personat që ndodheshin në bord kanë shpëtuar.

Një zyrtar i Ministrisë së Komunikacionit  tha se aeroplani “Lion Air Boeing 737” huqi pistën me rastin e aterrimit në aeroportin Denpasar në Bali.

Fotot dramatike që janë postuar nga përdoruesit e rrjetit social Twitter tregojnë aeroplanin e thyer në dy pjesë duke qëndruar në afërsi të shkëmbinjve. 

Aeroplani është aksidentuar  rreth 200-300 metra larg pistës.

Ndërkohë paniku mes pasagjerëve ka qenë i madh, pasi jeta e tyre ishte seriozisht në rrezik.

Sipas burimeve spitalore, të paktën shtatë pasagjerë janë sjellë në spital për shkak të lëndimeve në kokë dhe në disa raste thyerjeve të eshtrave që kanë pësuar. Ende nuk është bërë e njohur përkatësia shtetërore e pasagjerëve ndërsa nuk dihen as shkaqe e aksidentit.

Kompania Lion Air për shkak të rritjes së saj të shpejtë, duket se ka lënë mbrapa masat e sigurisë. Për këtë arsye fluturimet e saj janë të ndaluara në Bashkimin Evropian, në SHBA dhe në Zvicër.