Aktori Hugh Grant kërkon ndihmë për skriptin e humbur

Aktori britanik, Hugh Grant, iu kthye rrjeteve sociale për të kërkuar që t’i kthehet një skript që i ishte vjedhur nga vetura, të cilën e thyen hajdutët.  Ylli i filmit ‘The Paddington 2’ ka shkruar në Twitter që çanta e tij ishte vjedhur nga vetura të dielën mbrëma, bashkë me të, edhe të dhënat mjekësore të fëmijëve të tij.

“Ka pak gjasa që dikush mund të dijë se kush e theu veturën time dhe vodhi çantën time, andaj ju lutem që të tentoni t’i kërkoni dhe ta kthejnë skriptin tim”, shkroi Grant për 335 mijë ndjekësit e tij, përcjell albinfo.ch

“Aty ka shënime të shumë javëve të punës dhe ideve”, shtoi ai pa e identifikuar dokumentin dhe duke kërkuar që të njëjtat të kthehen në kompaninë ‘Coach Films’ në Londrën Perëndimore.

Aktori 58-vjeçar, i cili u bë shumë i famshëm në vitin 1994 në rolin kryesor të filmit ‘Katër martesa dhe një funeral’ së fundi mori pjesë në serinë “A Very English Scandal”.