Albin Kurti në Cyrih: Siguria si garanci e paqes dhe shtetndërtimi si përgjegjësi historike

Në tubimin elektoral me mërgatën shqiptare në Zvicër, Kryeministri në detyrë ndali veçmas te mbrojtja, ushtria dhe vizioni i Kosovës si shtet i konsoliduar, i aftë të mos lejojë më kurrë përsëritjen e dhunës

Në vazhdën e tubimit elektoral të mbajtur mbrëmë në Cyrih, Kryeministri në detyrë i Republikës së Kosovës, Albin Kurti, artikuloi një nga shtyllat më domethënëse të diskursit të tij politik: sigurinë si garanci të paqes dhe shtetndërtimin si përgjegjësi historike.

Në një mbrëmje të ngarkuar me emocione politike dhe kujtesë kolektive, fjalimi i tij nuk mbeti në kufijtë e një thirrjeje elektorale, por u shpalos si një rrëfim shtetëror mbi rrugën e Kosovës, nga mbijetesa historike drejt konsolidimit institucional, nga trauma drejt ndërtimit të garancive që dhuna të mos përsëritet më. Në këtë rrjedhë narrative, Kurti e ndërtoi mesazhin mbi idenë se paqja nuk është mungesë force, por rezultat i gatishmërisë për ta mbrojtur atë.

Duke folur për orientimin ndërkombëtar të Kosovës, ai theksoi se anëtarësimi në organizatat kyçe evropiane dhe euroatlantike nuk është synim deklarativ, por proces që buron nga përmbushja e standardeve dhe nga investimi konkret në siguri dhe mbrojtje. Sipas tij, “Kosova e meriton anëtarësimin në organizatat më të rëndësishme të kontinentit tonë dhe në NATO, jo si kërkesë politike, por si rezultat i investimit serioz që po bëjmë në mbrojtje dhe siguri”, duke e vendosur këtë aspiratë në kornizën e përgjegjësisë shtetërore dhe bashkëpunimit ndërkombëtar.

Në vijim, Kryeministri në detyrë ndaloi te ndryshimi rrënjësor i qasjes shtetërore ndaj Forcës së Sigurisë së Kosovës, duke e krahasuar qartë me periudhat e mëparshme. Ai rikujtoi se gjatë viteve 2018–2020 investimet në armatim dhe municion kishin qenë minimale, ndërsa në mandatin aktual janë rritur ndjeshëm. “Nga viti 2018 deri në vitin 2020, për armatim e municion janë dhënë më pak se 4 milionë euro; në mandatin tonë, mbi 430 milionë euro. Ky nuk është vetëm ndryshim buxhetor, por ndryshim qasjeje shtetërore”, theksoi Kurti, duke e cilësuar këtë si një korrigjim të domosdoshëm institucional.

Ai nënvizoi se ky transformim synon ndërtimin e një ushtrie moderne, funksionale dhe mbrojtëse, në përputhje me standardet e NATO-s dhe në bashkëpunim me partnerë strategjikë ndërkombëtarë. Rritja e kapaciteteve ushtarake, sipas tij, nuk përbën kërcënim për askënd, por shërben si garanci për stabilitet dhe siguri. “Ne nuk po ndërtojmë një ushtri për konflikt, por një ushtri për paqe, një ushtri që garanton se dhuna dhe masakrat ndaj popullit tonë nuk do të përsëriten më kurrë”, deklaroi ai.

Një pjesë e rëndësishme e fjalimit iu kushtua reflektimit historik. Kryeministri në detyrë rikujtoi katër periudha gjenocidale që shqiptarët kanë përjetuar gjatë një shekulli e gjysmë, duke theksuar se këto përvoja e bëjnë edhe më të domosdoshëm ndërtimin e një shteti të fortë dhe të drejtë. Megjithatë, ai nënvizoi qartë se orientimi i Kosovës nuk është revanshist. “Pavarësisht katër gjenocideve që shqiptarët kanë përjetuar brenda një shekulli e gjysmë, Kosova nuk është shtet revanshist; ajo kërkon drejtësi dhe garanci që historia të mos përsëritet”, tha Kurti.

Në një plan më konceptual, ai foli për kalimin nga forca e mbijetesës historike në vetëdije të plotë shtetërore, ku identiteti kombëtar shoqërohet me institucione funksionale dhe përgjegjësi publike. “Ne si komb kemi qenë të fortë historikisht, por sot detyra jonë është të ndërtojmë shtete të fuqishme,  Kosovën dhe Shqipërinë, me institucione që mbrojnë qytetarët e tyre”, theksoi ai.

Kurti bëri të ditur se Kosova tash e tri vite radhazi investon mbi 2 për qind të BPV-së në mbrojtje, ka trefishuar buxhetin për ushtrinë, ka dyfishuar numrin e ushtarëve dhe ka rritur ndjeshëm trajnimet dhe pajisjet, duke u mbështetur në konceptin e mbrojtjes gjithëpërfshirëse. Në këtë kuadër, ai theksoi se “gatishmëria për vetëmbrojtje është kusht i paqes” dhe se aftësia për ta mbrojtur veten kontribuon drejtpërdrejt në stabilitetin rajonal.

Në përmbyllje, Kryeministri në detyrë e lidhi këtë vizion shtetëror me procesin zgjedhor të 28 dhjetorit, duke e paraqitur atë si një moment reflektimi demokratik mbi drejtimin e ardhshëm të vendit. Ai theksoi se “siguria sociale, institucionale dhe territoriale janë në test më 28 dhjetor”, duke nënvizuar rëndësinë e vazhdimësisë institucionale dhe konsolidimit të shtetit të Kosovës si faktor stabiliteti dhe paqeje në rajon.

Për albonfo.ch  Luljeta Ademi

 

---