Aleanca Franceze e Prishtinës hap dyert për studime në Francë

Aleanca Franceze e Prishtinës së fundi ka hapur dyert për të rinjët të cilët dëshirojnë kurse dhe studime universitare në Francë.

Aleanca Franceze ka organizuar pritje për vizitorët, të cilët u njoftuan në lidhje me studimet universitare në Francë. Vizitorët u informuan në lidhje me studimet universitare në Francë dhe diplomat e gjuhës frënge që lëshohen në Aleancën Franceze: DELF, DALF dhe TCF.

Drejtoresha e Aleancës Franceze, Anne Sophie, ka hapur këtë aktivitet për krijimin e mundësive të reja për kurse dhe studime universitare në Francë, shkruan Ekonomia Online.

Ajo tregoi se kanë ofruar kurse që janë si teste për fëmijë dhe të rritur, si dhe i kanë njoftuar vizitorët për studimet në Francë, ku certifikata e Aleancës Franceze njihet për studime në Francë si dhe për punë.

“Sot është ditë e hapur e Aleancës Franceze, pra është dita kur ne i tregojmë të gjitha aktivitetet tona publikut. Sonte ofrojmë kurse të cilat janë vetëm si teste për fëmijë dhe të rritur. Pastaj do t’i informojmë njerëzit  për të gjitha aktivitetet e tjera kulturore që ofron Aleanca Franceze. Si dhe informata për studimet në Francë nga këndi, i cili është këtu, për t’i informuar studentët për të gjitha informatat kur t’i ndjekin studimet. Gjithashtu edhe për diplomat e gjuhës frënge, të cilat i ofrojmë, siç janë diplomat TELF DAF si dhe TISE. Janë diploma, të cilat i certifikojmë dhe mundësojnë për të studim në Francë ose punë”, tha ajo.

Aldi Krasniqi, vizitor në Aleancën Franceze, edhe pse shumë i vogël, u shpreh se ka ardhur këtu për ta rifreskuar këtë gjuhë, ngase ai ka pasur rastin të jetojë në Francë dhe e flet mirë frëngjishten.

“Frëngjishten e kam mësuar në Francë, kam jetuar atje. Kam ardhur këtu për të mos e harruar frëngjishten”.

Vizitorët mund të përfitojnë orë mësimi falas për t’u “njohur” me gjuhën frënge, për fëmijë, adoleshentë dhe të rritur.

Gjatë tërë ditës, vizitorët kanë fituar zbritje në regjistrime prej 10% dhe janë ofruar edhe specialitete të kuzhinës franceze për të gjithë të pranishmit, përcjell albinfo.ch.

---