FFK: Nuk ia dolëm, por gjithmonë krenar me djemtë tanë

FFK pas eliminimit nga Turqia: Nuk ia dolëm, por gjithmonë krenar me djemtë tanë

Federata e Futbollit të Kosovës reagoi pas humbjes minimale 0-1 në “Fadil Vokrri”, duke theksuar krenarinë për angazhimin e “Dardanëve” në rrugëtimin drejt Botërorit 2026, përcjell albinfo.ch.

Ëndrra e Kosovës për kualifikim në Kampionatin Botëror 2026 është shuar sonte në Prishtinë.

“Dardanët” nuk arritën të sigurojnë biletën historike për Botërorin, pasi në ndeshjen vendimtare të zhvilluar në stadiumin “Fadil Vokrri” u mposhtën minimalisht me rezultat 0-1 nga Kombëtarja e Turqisë.

Pas përfundimit të takimit, ka reaguar Federata e Futbollit të Kosovës (FFK), e cila pavarësisht zhgënjimit nga eliminimi, ka shprehur krenari për përfaqësuesen dhe për luftën e treguar gjatë gjithë rrugëtimit.

“Nuk ia dolëm, por gjithmonë KRENAR ME DJEMTË TANË”, ka shkruar FFK në reagimin e saj.

Kosova ishte vetëm një hap larg realizimit të ëndrrës së madhe për të qenë për herë të parë pjesë e një Kampionati Botëror, por rrugëtimi përfundoi me humbjen ndaj Turqisë, ndërsa përfaqësuesja kosovare pritet tashmë të fokusohet në synimet e ardhshme ndërkombëtare./Albinfo.ch

---