Ambasada Amerikane sërish bën thirrje për heqjen e taksës

Ambasada amerikane në Prishtinë i ka bërë edhe një herë thirrje Qeverisë për heqjen e taksës ndaj produkteve nga Serbia dhe Bosnja. 

“Veprimet që minojnë Dialogun, pengesat nga anash, dhe refuzimi për të pezulluar tarifat – gjitha këto shkojnë kundër interesave të SHBA-së. Ajo çka është e nevojshme tani është një lidership i guximshëm për të promovuar qëllimet tona të përbashkëta. Kjo është ajo që na ndihmon ne për të mbajtur një marrëdhënie të fortë bilaterale”, thuhet në reagimin e ambasadës amerikane. 

Aty thuhet se pezullimi i menjëhershëm i tarifës është masë e nevojshme për të rimëkëmbur momentumin në procesin e Dialogut. 

“Disa komentatorë dhe politikanë sugjeruan që statusi i Kosovës si shtet i pavarur dhe sovran dhe afërsisht i rreshtuar me Shtetet e Bashkuara, do ta mbrojnë atë nga gjitha pasojat e vendimeve të tij në arenën ndërkombëtare. Ne këshillojmë kundër të supozuarit se Kosova apo cilido mik tjetër i Shteteve të Bashkuara mund të ndërmarrë veprime që janë kundër interesave tona strategjike pa u ballafaquar me pasojat për marrëdhënien tonë bilaterale”, theksohet në reagim.