Ambasada e Zvicrës në Romë, cak i hakmarrjes anarkiste

Bomba ka qenë një "akcion ndëshkimi" për arrestimin e tre anarkistëve në prill të këtij viti në kantonin e Cyrihut

Pakot me bomba që shpërthyen para dy ditësh në Ambasadën e Zvicrës dhe në atë të Kilit në Romë, nuk kanë qenë të rastësishme. Sipas vlerësimit të Ministrisë së Brendshme të Italisë, Zvicra dhe Kili ishin caqe të qëllimshme për sulmuesit. Këtë qëndrim e mban edhe ambasadori I Zvicrës në Itali, Bernardino Regazzoni.

Bomba e dërguar në adresën e Ambasadës së Zvicrës ka qenë një “akcion ndëshkimi” për arrestimin e tre anarkistëve në prill të këtij viti në kantonin e Cyrihut. 

Këtë e ka konfirmuar një funksionar i lartë Italian për gazetën “Il Giornale”.

Ndërkaq, Ambasada e Kilit mendohet të ketë shërbyer si cak sulmi për arsyen se në Kil, në vitin 2009 ka humbur jetën një anarkist pasi që masa shpërthyese që po e bartte në çantë i kishte eksploduar para kohe.