Ambasadori Hovenier do të pensionohet pas misionit në Kosovë

Ai ka shprehur mirënjohje edhe ndaj administratës Biden për mundësinë e dhënë

Ambasadori i Shteteve të Bashkuara të Amerikës, Jeffrey Hovenier, i cili është në përfundim të mandatit të tij në Kosovë, ka njoftuar se pas përfundimit të shërbimit diplomatik në Kosovë, do të pensionohet.

Hovenier tha se ishte nderi i karrierës së tij të shërbejë në Kosovë.

”Unë do të pensionohem nga shërbimi federal, pas 34 vjetësh e shtatë muajsh, në fund të dhjetorit. Ishte nder dhe krenari për mua të punoj në Kosovë. Po ashtu ishte nderi i karrierës sime të punoj me ju në shumë mënyra, të ndihmoj në avancimin e asaj që tashmë keni arritur dhe po e konsolidoni – një Kosovë e pavarur, sovrane, multietnike dhe demokratike, një demokraci e suksesshme”, tha Hovenier ditën e dytë të edicionit të tetë të Konferencës për Integritet të Informacionit DISICON.

Ai ka shprehur mirënjohje edhe ndaj administratës Biden për mundësinë e dhënë.

Hovenier u emërua ambasador në Kosovë në nëntor të vitit 2021.

Ai është diplomat karriere i shërbimit të jashtëm amerikan, i cili ka qenë pjesë e stafit të të dërguarit të posaçëm të Kombeve të Bashkuara për statusin e Kosovës. /Reporteri.net

---