Ambasadori për ish-pjesëtarin e UÇK-së: Nder të takoja këtë trim të jashtëzakonshëm

Ambasadori britanik në Kosovë, Ruairi O’Connell, sot është takuar me Dervish Gashin, ish-pjesëtar i UÇK-së, dhe njëri prej personave që shpëtoi jetë gjatë sulmit terrorist që kishte ndodhur gjatë këtij viti në Londër, përcjell albinfo.ch.

Ambasadori britanik përmes një statusi në Facebook, ka thënë se takimi me Gashin ishte nder për të, dhe se ai dhe e gjithë Britania do t’i jenë mirënjohës gjithnjë.

“Nderi më i madh i mandatit tim, që sot e takova Dervish Gashin. Ky trim i jashtëzakonshëm, ish-pjesëtar i UÇK-së, ka rrezikuar jetën e tij duke shpëtuar jetën e shumë të tjerëve gjatë një sulmi terrorist në Borough Market në Londër. Kjo është trimëri e vërtetë. Britania, edhe unë personalisht, do të mbetemi gjithmonë mirënjohës për veprat e tij. Ai është shembull për të gjithë”, shkruan ambasadori britanik.

Sulmet kanë ndodhur brenda një nate në Borough Market, London Bridge dhe në zonën Vauxall ku mbetën disa persona të vdekur e të lënduar. Përgjegjësinë e kishte marrë ISIS.