Amerika lehtëson vizat për kosovarët

Sipas një njoftimi lëshuar nga Ambasada Amerikanë në Kosovë, ata që kanë vizë mund ta vazhdojnë pa pritur që ajo të skadojë  

Derisa Bashkimi Evropian nuk po jep shenja për liberalizimin e vizave për kosovarët, janë Shtetet e Bashkuara të Amerikës që kanë lehtësuar procedurat për marrjen e vizave për në Amerikë. Madje sipas një njoftimi lëshuar nga Ambasada Amerikanë në Kosovë, ata që kanë vizë mund ta vazhdojnë pa asnjë problem.

“Qytetarët e Kosovës që kanë një vizë B1/B2, C, D, C1/D, I, F, M apo J (Ende të vlefshme, apo të skaduar, jo më larg se 36 muaj) dhe që kanë kryer procesin e identifikimit të shenjave të gishtërinjve, mund të aplikojnë për vizë të re pa pritur që ajo të skadojë në bazë të programit “Waiver Program”, citon Zëri njoftimin e Ambasadës.

Ambasada njofton se aplikantët duhet të jenë në Kosovë në kohën kur paraqesin kërkesën e tyre për heqjen e vizave, dhe se ata që tashmë janë të pajisur me vizë amerikane nuk janë të detyruar të presin për skadimin e vizës përkatëse në mënyrë që të aplikojnë për vizën tjetër.

“Për të aplikuar në këtë program, ambasada amerikane njofton se nuk aplikohet asnjë lloj pagese, përveç pagesës së zakonshme “MRV Fee” prej 160 dollarëve. Ata që pagesën e kryejnë përmes bankës “Raiffeisen Bank”, nuk mund të pranohen në prorgramin “Waiver Program”, thuhet në njoftim.