Anulohen disa fluturime për dhe nga aeroporti “Adem Jashari”, shkak greva në Gjermani

Si pasojë e grevave në aeroportet gjermane, qindra fluturime për dhe nga vende të ndryshme të botës janë anuluar.

Greva e sindikatave ka prekur aeroportet e Hamburgut, Bremenit, Hanoverit, Berlinit, Dyseldorfit, Dortmundit, Këlnit/Bonit, Leipzigut/Halle, Shtutgartit dhe Mynihut.

Ndër të prekurit është edhe Aeroporti Ndërkombëtar i Prishtinës “Adem Jashari”. Qendra Kombëtare për Menaxhim Kufitar ka njoftuar përmes rrjetit social “Facebook” se greva ka ndikuar edhe në fluturimet nga dhe drejt Prishtinës, transmeton albinfo.ch.

“Njoftim me rëndësi nga Policia Kufitare në Aeroportin Ndërkombëtar ‘Adem Jashari’: Ju njoftojmë se, për shkak të grevës së përgjithshme të punonjësve të operimeve në aeroportet gjermane, gjatë ditës së sotme pritet të anulohen fluturimet në aeroportet ku kemi linja direkte,” thuhet në njoftim.