Armë e drogë nëpër shkollat e Kosovës

Brenda një muaji Policia e Kosovës ka konfiskuar rreth 4 kilogram drogë, disa armë brezi, boksa e shufra metali

Policia e Kosovës ka vazhduar aksionin e mëhershëm për kontrollimin dhe ligjërimin nëpër shkollat e Kosovës dhe brenda një muaji ka konfiskuar rreth 4 kilogram drogë, disa armë brezi, boksa e shufra metali. Këto statistika që i ka publikuar Policia e Kosovës tregojnë për dhunë dhe shfrenim tek të rinjtë.

Sipas njoftimit të Policisë, nga 2 tetor deri më 31 tetor, janë realizuar qindra kontrolle nëpër shkolla me në fushën operacionale në “Stop drogave në shkolla”. Sipas njoftimit të MPB-së, Policia ka kontrolluar persona të cilët kanë frekuentuar në zonën e sigurisë 300 metra rreth shkollave, po ashtu janë kontrolluar vetura, lokale dhe vende tjera të dyshuara.

Për periudhën raportuese njëmujore janë realizuar:  933  vizita dhe kontakte me personelin e shkollave; 1813 patrullime rreth shkollave; 2385 persona të kontrolluar; 958 vetura të kontrolluara;  75 lokale të kontrolluara; 23 ligjërata në shkolla dhe 1505 pjesëmarrës kanë marrë pjesë nëpër ligjërata.

“Si rezultat i angazhimit të shtuar policor janë iniciuar 101 raste dhe janë arrestuar  114 persona, prej tyre 25 janë nxënës. Prej tyre 38 persona kanë qenë shpërndarës të drogës, kurse 76 konsumues”, thuhet në njoftimin e Policisë. Sipas këtij institrucioni, –

Po, ashtu sipas të të njëjtit njoftim, janë sekuestruar: “Mariuhanë 3 kg e 781.75 g; Heroinë 267,5 g; 2 bimë të kanabisit; 1 tabletë ekstazy”. Kurse janë konfiskuar: “4804.6 euro; 4 armë; 54 fishekë; 1 boks hekuri; 1 veturë dhe; 1 shufër metalike”.

Bazuar në të dhënat statistikore dhe aktivitetet në teren vërehet se numri më i madh i rasteve është iniciuar në perimetrin e sigurisë prej 300 metra rreth shkollave si në parqe, rrugë e hapësira të tjera.