Arrestohet shqiptari i shumëkërkuar

Gjatë kontrollit në banesën e tij, u gjet një armë revolver kalibër 38 si dhe 41 plumba

Policia italiane ka realizuar një tjetër aksion të suksesshëm, duke arrestuar njërin ndër personat më të kërkuar për trafik droge, shkruan albinfo.ch.

Një shqiptar i shpallur në kërkim nga polica italiane u arrestua në banesën e tij, ndërsa ishte i armatosur. 32-vjeçari me iniciale P.O., ishte në mesin e 34 personave të tjerë të akuzuar për trafik droge, kokainë, heroinë dhe hashash, aktivitet i shtrirë kryesisht në Siçili dhe në Italinë qendrore.

Ai banonte në Marino dhe në kohën që është gjurmuar nga policia nuk ka qenë në banesë. Më pas, nisën vëzhgimet për disa ditë me radhë duke e identifikuar se ku fshihej.

Gjatë kontrollit në banesën e tij, u gjet një kapuç, një armë revolver kalibër 38 si dhe 41 plumba.

Pas arrestimit, shqiptari është dërguar në burgun e Velletrit në dispozicion të drejtësisë. Ndaj tij, ishte lëshuar urdhri i arrestit nga Gjykata e Katanias.