Arsyetimi i Panuccit për humbjen nga Norvegjia

“Kemi krijuar shumë pak, sepse lojtarët nuk ishin mirë fizikisht, ndërsa dy prej tyre ishin debutues dhe nuk ia dolën. Morëm disa indikacione në këtë takim, qofshin pozitive apo negative", deklaroi Panucci

Christian Panucci u shfaq mjaft i qetë në përfundim të takimit miqësor me Norvegjinë, teksa evidentoi se ishte pikërisht gjendja e keqe fizike e kuqezinjve, ajo që ndikoi në mbarëvajtjen e takimit.

“Besoj se në këtë moment shumë lojtarë nuk janë mirë fizikisht dhe kjo u pa. Norvegjia bëri diferencë vetëm në aspektin fizik, pasi na dominoi. E kemi nisur me 4-3-3 dhe në pjesën e dytë me 4-3-1-2. Ky ishte ndryshimi i vetëm taktik”, deklaroi Panucci pas ndeshjes, përcjell albinfo.ch.

“Kemi krijuar shumë pak, sepse lojtarët nuk ishin mirë fizikisht, ndërsa dy prej tyre ishin debutues dhe nuk ia dolën. Morëm disa indikacione në këtë takim, qofshin pozitive apo negative. Nuk është se kemi 200 lojtarë për të përzgjedhur. Gjithsesi kërkoj t’i mbështes dhe t’i ndihmoj. Gjithsesi, nëse do të ishim në formën e duhur, do të flisnim për një tjetër ndeshje”, theksoi italiani.

Ai foli edhe për debutuesit. “Vura re që Ramadani bëri një ndeshje mjaft të mirë dhe Bare ka autoritet për të luajtur. Kuptova se jemi shumë të brishtë në mbrojtje, pasi Mavraj dhe Ajeti po luajnë shumë pak. Edhe minutat e pakta të Sadikut, ndikojnë në formën e tij”, nënvizoi përzgjedhësi i Shqipërisë.