Artistët shqiptarë elektrizojnë skenën në Sunny Hill, Stormzy performon me flamurin e Kosovës

Foto: Albinfo.ch

Në ditën e tretë të festivalit “Sunny Hill”, artistët shqiptarë që performuan arritën të elektrizojnë skenën.

Me “Semaforin” e MC Kreshës e Lyrical Sonit, posa në sfond është dëgjuar melodia e “himnit” të këtij festivali, publiku ka shpërthyer.

Shumë prej publikut në hapje kanë thënë se më shumë se për artistët e huaj, kanë ardhur për këta artistë vendorë. E kanë kënduar re-makein “Hip hop” versi i të cilit përfshin një pjesë të këngës së rock-grupit Mak – “Idile verore”. Ia ka lënë në dorë publikut për ta vazhduar. Kjo e dëshmon se i njeh mirë secilën këngë të tyre.

Problemet teknike janë përsëritur edhe në natën e tretë. Ata kanë ngecur disa herë në përcjelljen me vokal.

Artisti Getoar Selimi i njohur për publikun si Ghetto Geasy, ka interpretuar hitet e tij, kryesisht bashkëpunime me të tjerë artistë. “Si ajo”, “Malena”, “S’jena mo” kanë qenë disa prej këngëve që e kanë ndezur publikun që ka kënduar shpesh me të.

Në skenë është ngjitur Ledri Vula. Ka kënduar “SRMN”. Krejt publiku i është bashkuar në interpretim të refrenit “Sun rrin me neve…”. E ka ndezur atmosferën me “Thirrëm qysh dush”.

Para mesnatës në skenë është ngjitur kantautorja angleze Sarah Faith Griffiths, e njohur me emrin skenik Griff. Po këndon këngë nga albumi i saj “Vertigo”.

Atmosfera ka kulmuar me daljen e Stormzyt në skenë. I shoqëruar nga fishekzjarrje të shumta, reperi britanik shkaktoi entuziazëm te fansat duke u shfaqur me flamurin e Kosovës në supe.

“Është hera e parë që jam këtu. Jam Stormzy, vijmë nga jugu i Londrës dhe kemi vetëm një qëllim sonte. Që të gjithë këtu të largohemi me kujtimin që për 20-30 vjet ta mbani mend se jemi kënaqur. Vetëm më jepni pak energji dhe do të jap gjithçka që mundem në skenë. Do ta bëj këtë natë të paharrueshme për ju Kosovë”, tha reperi para publikut të pranishëm.

 Stormzy, ka qenë vet i dhjeti në skenë që e kanë bërë performancën e tij të fuqishme në “Sunny Hill”. Por pritja që ia ka bërë publiku, e ka emocionuar edhe vetë atë.

“Hera e parë që jam këtu dhe nuk do të ju harroj kurrë. Betohem që jam jashtëzakonisht shumë falënderues. Ju dua shumë. I kam thënë edhe ekipit para se të fillonte mbrëmja. Faleminderit shumë për këtë pritje”, deklaroi Stormzy.