Asociacioni Shëndetësor i Zvicrës, vizitë në Kosovë

6 anëtarë të kryesisë së Asociacionit të profesionistëve shëndetësorë të Zvicrës do të vizitojnë Kosovën nga 20 deri më 22 qershor

Ideja për themelimin e Asociacionit të profesionistëve Shëndetësorë në Zvicër lindi gjatë punëtorive të organizuara nga projekti ‘Diaspora për Zhvillim’ mbi Sistemin Shëndetësor, të cilat u mbajtën në Zvicër dhe Kosovë gjatë vitit 2012.

Një grup prej 3 profesionistëve shëndetësorë u angazhuan për identifikimin e profesionistëve shëndetësorë shqiptarë në Zvicër.

Qëllimi ishte lobimi tek ata për t’iu bashkangjitur thirrjes për themelimin e një asociacioni të përbashkët të profesionistëve shëndetësorë, i cili ka për qëllim krijimin e infrastrukturës së nevojshme për transferimin e njohurive dhe eksperiencave në sektorin e shëndetësisë dhe mirëqenies sociale nga Zvicra në Kosovë, thuhet në një njoftim të “Diaspora për Zhvillim”.

Si rezultat më 9 mars 2013 u themelua Asociacioni i Profesionistëve Shëndetësorë në Zvicër, i cili numëron rreth 100 profesionistë shëndetësorë të fushave të ndryshme.

Për të krijuar lidhje me institucione dhe organizata shëndetësore dhe asociacione simotra, 6 anëtarë të kryesisë së Asociacionit do të vizitojnë Kosovën nga 20 deri më 22 qershor.

Gjatë kësaj vizite dy ditore në Kosovë ata do të takohen me Ministrinë e Shëndetësisë atë të Diasporës, do të vizitojnë Qendrën Emergjente të QKUK-së, Asociacionin e mjekëve familjarë, Qendrën e Zhvillimit të Mjekësisë Familjare, Qendrën e Edukimit të vazhdueshëm Profesional, Shtëpinë e Pleqve në Prishtinë si dhe asociacionet simotra në Kosovë, duke përfshirë edhe një Qendër Kryesore të Mjekësisë Familjare.

Ndërsa ditën e dytë ata do të mbajnë një punëtori me pjesëtarët e institucioneve të shëndetësisë si dhe mirëqenies sociale si dhe asociacioneve simotra në Kosovë për t’i njoftuar me qëllimet e asociacionit si dhe për t’i elaboruar mundësitë e bashkëpunimit në të ardhmen, thuhet në njoftimin e DvD-së