Australia shpall gjendjen e jashtëzakonshme, temperatura të larta

Zjarret janë përhapur në Australi që nga shtatori, duke lënë të vdekur të paktën 28 njerëz, duke shkatërruar mijëra shtëpi e duke djegur miliona hektarë tokë

Australia ka shpallur gjendjen e jashtëzakonshme për kryeqytetin Canberra dhe rajonet përreth, teksa temperaturat e larta dhe rrymat ajrore oqeanike përbëjnë kërcënim për shuarjen e zjarreve në vend. Temperaturat në këtë vend do të luhaten mes 42 deri në 45 grad celsius, transmeton albinfo.ch.

Kjo është hera e parë që prej vitit 2003 që autoritetet australiane vendosin të ndërmarrin një vendim të tillë.

“Zjarri mund të bëhet i pakontrollueshëm dhe i paparashikueshëm”, citohet të ketë thënë zyrtari i lartë, Andrew Barr, pas takimit me forcat zjarrfikëse që kërkuan vullnetarë në punën e tyre për përballimin e situatës.

Kujtojmë se shirat e rrëmbyeshëm dhe stuhitë patën vërshuar në disa pjesë të bregdetit lindor të Australisë, javë më parë, duke bërë që të shuhen disa nga zjarret, por duket se prapë moti po sjell një kërcënim të ri për të nxehtin e madh në disa zona të Australisë./ Albinfo.ch

 

---