Austri, shqiptari vlerësohet me “Unazën e nderit” nga Opera e Vjenës

Balerini shqiptar Eno Peçi është vlerësuar nga Opera e Vjenës me “Unazën e nderit”. Një vlerësim që u jepet artistëve më të rëndësishëm të operës austriake, përcjell albinfo.ch.

Peçi ka shkruar se tashmë i janë bërë 24 vjet punë në këtë institucion të lartë kulturor, duke u shprehur se është i emocionuar për këtë nder që i është bërë.

Lajmin e ka publikuar vetë artisti në profilin e tij në Facebook, ku shkruan:

“24 vjet në Operën dhe Baletin Shtetëror të Vjenës! Faleminderit për këtë Unazë nderi! Nderi im është të punoj në këtë shtëpi të bukur me një histori kaq të madhe dhe një kulturë të pasur! Dhe ne ende e duam njëri-tjetrin! I emocionuar edhe për shumë vite të tjera”.

Eno Peçi ka lindur në Tiranë, Shqipëri. Ai u shkollua në Akademinë e Baletit të Tiranës dhe në moshën 16-vjeçare u largua drejt Austrisë, ku pati mundësinë të pranohej dhe të studionte në  Shkollën e Baletit të Operës Shtetërore të Vjenës. Në vitin 2000 iu bashkua Baletit Shtetëror të Vjenës. Në vitin 2003 u emërua Demi-Solist dhe në 2009 Solist i Baletit të Operas Shtetërore të Vjenës dhe Volksoperit

Që nga prej vitit 2009 Eno Peçi ushtron karrierën e tij edhe si koreograf.