Austria synon ta heqë çdo kufizim për koronavirus

Austria synon t'i heqë të gjitha kufizimet për koronavirus brenda këtij viti, ka thënë ministri austriak i Shëndetësisë, Johannes Rauch.

Austria synon t’i heqë të gjitha kufizimet për koronavirus brenda këtij viti, ka thënë ministri austriak i Shëndetësisë, Johannes Rauch.

Duke folur për të përditshmen Kronne Zeitung, Rauch ka thënë që në rast se ndodh diçka e tillë, COVID19 – sëmundja që shkakton koronavirusi – nuk do të ishte më sëmundje serioze dhe shteti do t’i kthehej normales, përcjell Albinfo.ch.

Sipas tij, vala aktuale e pandemisë në Kinë nuk përbën rrezik të madh në Austri. “Ne kemi marrë të gjitha masat e nevojshme. Nuk shoh shenja të kërcënimit në këtë moment”, tha ai.

Ndonëse ministri austriak ka thënë se nuk pret zhdukje të virusit, ai ka përmendur se Austria është e përgatitur. Ai tha se ka vaksina, ka ilaqe dhe se janë duke vëzhguar variantet.

Rauch ka përmendur edhe heqjen e masës aktuale për vendosjen e maskës në transportin publik të Vjenës. Kjo masë vlen edhe kur një qytetar austriak viziton qendrat e shëndetit publik.

Për koronavirusin e ri është raportuar për herë të parë në dhjetor të vitit 2019 në Vuhan të Kinës. Organizata Botërore e Shëndetësisë e pati shpallur koronavirusin si pandemi më 11 mars të vitit 2020.

Më shumë se 6.7 milionë njerëz kanë vdekur që prej shpërthimit të pandemisë në gjithë botën. Shtetet e Bashkuara kanë regjistruar numrin më të madh të viktimave, të përcjella nga India dhe Brazili./Albinfo.ch

---