Azilkërkuesit e çojnë ministrin gjerman në Shqipëri e Serbi

Ministri i brendshëm gjerman, De Maiziere do të kërkoj nga autoritetet e Shqipërisë dhe të Serbisë që të jenë më të kujdesshëm me azilkërkuesit dhe minoritetet

Numri i madh i azilkërkuesve nga Shqipëria dhe Serbia në Gjermani, e ka shtyrë ministrin e Brendshëm gjerman, Thomas de Maiziere të udhëtoj për një vizitë dyditore në Tiranë e Beograd. Ministri Maiziere do të kërkoj nga autoritetet e këtyre dy vendeve që të jenë më të kujdesshëm me refugjatët dhe minoritetet.

Bundestagu së fundi miratoi një ligj, që parashikon kufizimin e fluksit të azilkërkuesve nga vendet e Ballkanit.

Numri i azilkërkuesve nga njerëzit që vijnë nga vendet e Ballkanit Perëndimor në dy vitet e fundit është rritur ndjeshëm. Kërkesat për azil të këtij grupi njerëzish nuk kanë sukses, sepse sipas vlerësimit të autoriteteve gjermane në këto vende nuk ka persekutim politik, raporton DW.

Argumenti i persekutimit politik, siç thuhet në artikull, merret parasysh në kërkesat për azil, por nuk pranohet si argument varfëria ekonomike. Organizatat e të drejtave të njeriut dhe ato për refugjatët në të kundërt argumentojnë, se veçanërisht romët në këto vende përballen me diskriminim dhe përndjekjen.

De Maiziere gjatë vizitës së tij do të bisedojë me politikanët përgjegjës në Serbi dhe në Shqipëri edhe për mbrojtjen e pakicave.

Tema të tjera të vizitës janë edhe procesi i anëtarësimit në BE si dhe lufta kundër kriminalitetit të organizuar dhe korrupsionit.

Me ligjin e miratuar nga Bundestag-u vendet si Serbia, Bosnje-Hercegovina dhe Maqedonia klasifikohen si vende të sigurta origjine. Kërkesat për azil nga njerëzit që vijnë prej këtyre vendeve përpunohen shumë shpejt dhe refuzohen, thuhet më tej në raport.

Fillimisht ministri de Maiziere donte të përfshinte në këtë listë edhe Shqipërinë e Malin e Zi, por me këtë ai hasi në rezistencën e Partisë Socialdemokrate në koalicionin qeverisës. Ky ligj duhet të miratohet tani edhe nga Bundesrati (Këshilli Federal)…