Aziz Pollozhani në garë për Strugën

Ish-diplomati shqiptar, Aziz Pollozhani edhe pse kishte deklaruar se do t‘i kthehet arsimit, mediat e Shkupit bëjnë të ditur se ai është në garë brenda BDI-së për të kandiduar për kryetar të komunës së Strugës.

Pollozhani është kandidati më serioz në garë për komunën e Strugës nga radhët e BDI-së, raportojnë mediat në Shkup duke cituar burime brendapartiake.

Në zgjedhjet e brendshme partiake, Pollozhani do të garon me kryetarin aktual të komunës së Strugës, Ramiz Merko, i cili ka njoftuar se dëshiron edhe një mandat të tretë për kryetar komune dhe pret mbështetjen ne BDI-së.

Ish-ministri i arsimit dhe ambasadori i Maqedonisë në Gjenevë, Pollozhani, sipas burimeve partiake, ka pasur mbështetjen nga themeluesit e BDI-së në Strugë dhe nga zëvendëskryeministrit Musa Xhaferi, ndërsa Merko ka pasur përkrahjen nga krahu tjetër i partisë nga Rafiz Aliti dhe Gëzim Ostreni.

Mirëpo gjasat më të mëdha për kandidat të ardhshëm për kryetar partie nga radhët e BDI-së në Strugë i ka Pollozhani nga vet fakti që ai nuk u ul në karriken e rektorit të Universitetit Shtetëror të Tetovës, pozitë që iu premtua pas tërheqjes nga posti i ambasadorit në Gjenevë.

Sipas mediave të Shkupit, Pollozhani kërkon kandidaturën në Strugë si kompensim për faktin që nuk u emërua rektor i USHT-së.

Vendimi do të diskutohet në selinë kryesore të partisë në Reçicë të Vogël, mes të tjerash ku pritet edhe zyrtarizimi i Teuata Arifit, si kandidate për kryetar të komunës së Tetovës, siç është raportuar ditëve të fundit.