“Babai” shfaqet në Berlinale

Pas kandidimit të filmit “Shok” për “Oscar”, në Festivalin Ndërkombëtar të Filmit në Berlin (Berlinale) këtë vit do të shfaqet filmi “Babai”.

Filmi i regjisorit kosovar, Visar Morina, do të shfaqet në edicionin e 66-të të Berlinales, në kuadër të programit “Lola at Berlinale”. Filmi do të shfaqet të premten, më 12 shkurt, në orën 16 në kinemanë Zoo Palast, ka njoftuar Qendra Kinematografike e Kosovës.

Filmi “Babai” është një ndër filmat më të suksesshëm të kinematografisë sonë. Aktori Astrit Kabashi, protagonist i filmit, ditë më parë e fitoi çmimin aktori më i mirë në festivalin Angers Film Festival në Francë.

“Babai” tregon rrëfimin e një fëmije të quajtur Nori (Val Maloku), i cili shet cigare bashkë me babain e tij, Gëzimin (Astrit Kabashi), në vitet e nëntëdhjeta, ku babai me çdo mënyrë dëshiron të emigrojë në Gjermani, e i biri bën çdo gjë për të qenë me të.

Marrëdhënia mes babait dhe të birit zhvillohet deri në pikën ku asgjë mes tyre nuk është më ashtu si ka qenë, për arsye se i biri ka shumë dëshirë të jetë së bashku me babain dhe në të njëjtën kohë duhen të përballen me realitetin e vështirë…

Drejtori i Qendrës Kinematografike të Kosovës, Arben Zharku, është shprehur shumë i lumtur për pjesëmarrjen e këtij filmi në Berlinare. “Një lajm shumë i gëzueshëm për prezantimin e kinematografisë kosovare në njërin ndër festivalet më të mëdha në botë”, ka shkruar Zharku, përcjell “albinfo.ch”.

“Babai” është prodhim i “NikoFilm” nga Gjermania, produksioni “Krusha” nga Kosova, “Skopje Film Studio” nga

Maqedonia dhe “Eaux Vives Productions” nga Franca.

http://www.berlinale.de/en/programm/berlinale_programm/datenblatt.php?film_id=201614618#tab=filmStills

Albinfo.ch