Bajerni fitoi titullin e kampionit

Futbollisti shqiptar Xherdan Shaqiri kësaj here ndeshjen e ka shikuar nga banka e rezervistëve ndërsa në fund ka parakaluar në fushë me flamurin kosovar dhe atë zviceran

Fitues i finales së Ligës së Kampionëve në mes të FC Bayernit të Munihut dhe Borussia Dortmund është Bayern, me rezultatin 2:1.

Ndeshja është luajtur në stadiumin “Wembley” të Londrës në një atmosferë madhështore. Dy klubet më të mëdha gjermane dhe ndër më të fortat në Evropë kanë ofruar një lojë shumë dinamike, të cilën në fund e fitoi Bajerni me rezultat 2:1. Golin e parë e ka shënuar për Bajernin Mandukic në minutën e 59-të ndërsa në minutën 67 e ka barazuar nga penalltia Gondogan për Dortmundin.

Ndërsa golin e fitores në minutën e fundit e ka shënuar Arjen Robben.

Futbollisti shqiptar Xherdan Shaqiri kësaj here ndeshjen e ka shikuar nga banka e rezervistëve. Megjithatë, xhuxhi magjik është shqiptari i parë i cili me ekipin e tij ka fituar në Ligën e Kampionëve dhe në përgjithësi në ndonjërën nga kupat evropiane.

Ka rënë në sy me defilimin e tij me flamurin e Zvicër dhe atë të Kosovës në përfundimin e ndeshjes, duke mbajtur kupën e fituar.